Coeperunt discipuli linguae Graecae, qui autumno hiemalique Luciani colloquia legerant, Platonis Convivium legere. Difficilior lectu est Plato et longe difficilior intellectu, sed mirum in modum facundos et capaces se ostendunt discipuli, qui spem meam cotidie superant.

Velim autem diutius cogitare de feriis Atheniensium “Thesmophoriis” dictis et Convivio Platonis. Nam in principio colloquii ascendunt Apollodorus et Glaucon Athenas, qui in mentem vocat primus Thesmophoriarum dies, ἄνοδος, quo die feminae feruntur inter se convicia et sermonem vulgarem tradisse. Itaque etiam Glaucon a Platone dicitur nomine lusisse Apollodori atque eum ὦ Φαληρεύς vocasse. Deinde, tota sacra Themsophorica poscunt, ut feminae et viri seiungantur, ut etiam viri in Platonis Convivio cupiunt feminas arcere. Tunc etiam viri in Convivio vino sic abstinent, ut secundo die Thesmophoriorum, Νηστεία dicto, feminae ieiunium servant. Postremum ultimus dies Thesmophoriorum, qui Καλλιγένεια appellatur, conferendus videtur cum illo Convivii loco, ubi Diotima loquitur de amatoribus sapientiae, pulchritudine illuminatis, qui inter se colloquendo et animis coniungendis nova in lucem edunt.