Heri Bellinghamiae experrectus sum octava hora matutina (longe serius quam soleo): profectus sum Bellinghamia paulo post mediam noctem, et nocturno itinere adveni Seattlum, ubi tertia hora in aeroportum sum a custodibus benignissime exceptus (qui me per portam gubernatoribus aeroplanorum et ministris aeroportus destinatam admiserunt). Quinta hora profectus sum Seattlo, et ad meridiem (secundum rationem qua incolae huius loci tempus metiuntur) adveni ad hunc locum ubi nunc alterum aeroplanum exspecto. Cras duas maiores urbes Europaeas visitavero tribus aeroplanis vectus antequam finem vagandi faciam et in lecto potius quam aeroplano dormiam. Vitam videor agere Carminis Sandiego: me numquam invenietis, benevoli lectores!

At, si in aeroplanis dormio, etiam in aeroportibus operam do consiliis in annum proximum capiendis. Scholae enim sunt parandae: et novam scholam nuper nactus sum, itaque negotiosissimus ero tempore autumnali.